STRUCTOR

STRUCTOR

Petronio Arbitro qui fercula puerorum manibus allata apte disponit. Iuvenalis Sat. 7. v. 184.

----- Veniet qui fercula docte

Componat -----

Quae itaque Coquus elaboraverat, collocabar Structor. Unde iterum Petron. Superque proprium convenientemque materiae Structor imposuerat cibum. Graece proin Τραπεζοκόμος dictus, apud Athenaeum Dipnosophist. l. 4. Ι᾿όβας ὁ βασιλἐυς τὸν αὐτὸν εἶναί φησι τραπεζοκόμον καὶ τὸν ἀπὸ Ρ῾ωμαίων καλούμενον Στρούκτορα: I. e. Iuba Rex eundem censet esse mensae curatorem, quem Romani Structorem appellant. Et hunc famulitii ministerialis Praesulem videtur constituere Macrobius Saturnal. l. 1. c. ult. Inter haec servilis moderator obsequii, cui curae vel adolendi Penates, vel struendi penum et domesticorum actuum ministros regendi, admonet dominum, familiam pro sollennitate annui moris epulatam. Virgilium autem imitatur Macrobius, qui sic Aen. l. 1. v. 706.

Quinquaginta intus famulae, quibus ordine longô

Cura penum struere, et flammis adolere Penates.

Ubi Servius, Struere, inquit, ordinare, componere: unde et Structores dicuntur ferculorum Compositores. Donatus vero procurationem Cellarii, et Deorum Penatium cultum interpretatur. Quae sequuntur, v. 709.

Centum aliae, totidemque pares aetate Ministri,

Qui dapibus mensas onerent et pocula ponant:

de Infertoribus et Pocillatoribus accipienda sunt. Structoris enim erat componere et servare fercula, non inferre. De eodem Seneca l. de Vita beata c. 17. Quare Ars est, apud te ministrare: nec temere, et, ut libet, collocatur argentum, sed perite struitur. Plautus Menaechmis, Actu 1. Sc. 1. v. 25.

Cereales cenas dat, ita mensas exstruit,

Tantas struices concinnat patinarias, etc.

Dum autem Seneca pergit, Et est aliquis scindendi obsonii Magister: Scissorem quoque habemus, quem una cum Structore producit: ut et iuvenalis facit Sat. 5. v. 120.

Structorem interea, ne qua indignatio desit,

Saltantem spectes, et Chironomanta volanti

Cultello donec peragat dictata Magistri

Omnia.

Quamvis enim partes hae aliquando ab ipso Tapulla seu convivii Magistro, nonnumquam a Coquis obirentur, communius tamen erat, ut servi edocti inspectantibus convivis cibos dividerent. Sed de Scissore dictum supra, in hac voce, ut et in voce Carptor. Sunt quoque, qui Architectum Structorem vocent, seu potius Architecti Ministrum. Abdias Histor. Apostol. l. 9. A' Domino, inquit, meo Rege Indiae missus sum, requirens Artificem Structorem, qui ei palatia possit aedificare. Vide quoque D. Zenonem c. de praec. Attende tibi, et plura hanc in rem, apud Laur. Pignorium Com. de Servis, Tit. Popmam, de operis Servorum, Dempsterum Paral. in Rosinum l. 5. c. 29. Alios. Hinc Structores conviviorum ὀικοδόμους δείπνων eleganter vocat Hesychius, qui Graece propriâ voce τραπεζοκόμοι dicebantur. Eorum frequens in Inscr. mentio est. Quid autem Structura proprie sit, vide et hîc infra.